Total Views

Saturday, December 22, 2012

Wo surkh coat wali larki.


By: Hameem Hussain.

Wo kahan gum sum rehti hai ?
Akeli wo surkh coat main sardi ka mausam jhelti hai.
Usay surkh cheesain pehnnay say mana karo.

Wo kush nahin afsurda nazar aati hai.
Usay batao kay khusi libas say nahin chehray say jhalakti hai.

Wo akeli rastay par chalti hai.
wo peechay mur mur kay dekhti hai.
Wo shaed umeedain rakhti hai.
Usay seedha chalna sikha do.

Wo sab pay bharosa rakhti hai.
Aur sar utha kar asmaan dekha karti hai.
Janay wo kia duaain karti hai.
Usay kaho youn na bharosa kia karay.

Wo sab ko khush karti hai.
Hansaanay ki koshish karti hai.
Phir agar kamray mein akeli ho,
To kyun wo ronay lagti hai ?
Usay kaho wo youn na roya karay.

Jab jab barish hoti hai.
Sayhen main wo dor lagati hai.
Aasman say shikayat karti hai.
Apnay aansoo bahanay kay liyay wo phir waheen but ban jati hai.
Usay kaho wo barish say youn na batain kia karay.

Apnay doston main wo ghul mil kay rehti hai.
Phir kyun agar koi dekhay na to khamoshi ikhtyar karti hai.
Phir agar koi sunay na to wo ahain bharti hai ?
Usay kaho wo sirf apnay liyay jia karay.

Main door say us ko dekhta hoon.
Wo gum sum itni rehti hai.
Wo surkh coat main larki
Itni afsurda kyun rehti hai
Usay kaho wo khush raha karay.



2 comments:

Translate

Search This Blog